ياسك وصبرك بين أيديك أنت حر
تيأس ما تيأس الحياة راح تمر
أنت دقت مندا ومندا عجبى لقيت
الصبر مر وبرضك اليأس مر
عجبى
لو انضنيت وعمرى اتفرط
مش عايز الجأ للحلول الوسط
وكمان شطط وجنون مانيش عاوز
يا مين يقول لى فين الصح وفين الغلط
عجبى
أنا شاب لكن عمرى ولا ألف عام
وحيد ولكن بين ضلوعى زحام
خايف ولكن خوفى منى أنا
أخرس ولكن قلبى مليان كلام
عجبى
لا تجبر الإنسان ولا تخيره
يكفيه ما فيه من العقل بيحيره
اللى النهاردة بيطلبة ويشتهيه
هو اللى بكرة ح يشتهى يغيره
عجبى
حاسب من الاحزان وحاسب لها
حاسب على رقابيك من حبلها
راح تنتهى ولابد راح تنتهى
مش انتهت احزان قبلها
عجبى
ليست هناك تعليقات:
إرسال تعليق